JO-Skitourenwochende in der Fromatthütte

Früeh am Morge isch es ds Bärn losgange nach Zweisimmen. Ds Alpetaxi het üs no es Stückli müesse ufefahre, bis mir es Schümli Schnee hei gse. Mit de Ski ufbunde si mir zum richtige Schnee gloffe. Bevor als mir zur Hütte si ufe gloffe, hei es paar vo üs no müesse lehre, wie me uffället. nach 2 Stund si mir acho. Nachem Zmittag si mir wieder ufbroche zum Fromattgrat, für es Paari ischs di ersti Skitour gsi:)

Nach paar schöne Häng hei mir Züpfe bache und Znacht gkochet, es het feins Risotto mit Pilz gä und zur Vorspiis hets e gmischti Suppe gä. Zum Dessert no Schoggicreme:) Nach es paar Tichu Rundine hei mir de langsam der Wäg ids Bett gfunde.

Am nächstä Morge hets die feini Züpfe gä und no viu Anderes! Die ganzi Hütte isch glärt worde und när hei mir üs ufe Wäg gmacht, für die zwöiti Skitour. Da si mir ufe Mariannenhubel gange. Uf em Wäg het me no es paar mau mit Harschise d Spitzcheri chönne üebe. Ufem Gipfu hei mir Zmittag gässä mit ere tolle Ussicht und chli emne böse Wind. D Dounejacke vom Andi isch abe blaset worde, ds isch ds Zeiche gsi zum witerfahre. Nach es paar schöne Schwüng im Tiefschnee und ere steilä Passage, simer im Bereich vor Schneegrenze gsi. Ab da hets e Wäg gha wo teils Schnee gha het und teils nid. Ds isch d Glägäheit gsi ds üebe, wie me id und us dr Skittouräbindig chunnt.

Nachdems klar gsi isch, ds ke Schnee meh chunnt, hei mir d Ski ufbunde und si zum Poschi ufd Grimmialp abe gloffe. Dert het üs dr Andi no di vom Abe vorher versprocheni Theorie über Lawinerettig bibracht. Da isch scho z Poschi igfahre und mir si mit viune schöne Erinnerige a di zwöi Täg im Schnee zrügg uf Bärn gfahre.

Tourenleitung: Andi