Priendlerstau und JO-Gipfel am Sustenlochspitz

Ä usflug Steigletscher mit auäm drum u dra!

Mer hei üs am zä vor sibni am Bahnhof Bärn troffe u si när mit dr SBB u dr Zentraubahn uf Meiringe gfahre. Wüw di gäubi Klass üs nid het wöue i üses Bascamp bim Steigletscher fahre, het üs ds Aupetaxi Inäbnit sicher dörthäre gfahre. Nach äm uspacke si mir de ganz baud Richtig Pfriendler glofe. Dä Walk vo 50 Minute hei mir im Schnutz beändet. D Mehrseillängichlätterwand het üs nach äm uschäse vor Route begrüesst. Ä Teil vo üs heit ds Tröimli gmacht, während dr di ander Heufti di woubekannti Via Fritz gmacht hei. Nach stou ir Via Fritz wäge queerstigendä schlotterde Afängerchlätterer us äm dütsche Ruum hei mirs de mit viu schöne Züg uf ds Top vor Route chönne chlättere. Nach ere Gratchlättersustegneisabwärtszwöi-c hei mirs am churze Seil zum Start vor Route gschafft. Füfhundert Höhemeter witer unde hei mir üs sehr fescht über ds Ässe gefreut. Leider hets ds Selleriesuppe u Härdöpfugratin mit Rüeblisalat nid gä, sondern Gmüessuppe u Spätzli mit oder ohni tierischem Zuesatz.
Am nächschte morge het üs zmits ir Nacht am viertu vor drü Lucie geweckt. Ä viertustund speter hei mir es süesses Zmorge chönne gniesse. Haargnau 03:53 si mir Richtig Suschtepass lösgwatschlet. Ziu vo üsem Hochtouretrekking isch dr Sustelochspitz uf 2917 Meter über Meer. Nach rund einehaub Stund T2 u T4 wandere hei mir purlimuter üsi Stigise agleit u si so 150m ufe zum Guferjoch glüfe. Stigise ab, Gschtäutli u Materiu a u de si mir ab dört mängisch am churze, aber ab u zue ou mit äm lange Seil chlätteret. Üses moto isch gsi, chlättere, wis üsi Grossvätere u Grosis ou gmacht hei. Mir hei um Zagge a däm Grat gsicheret. Zu dere Masnahm hei mir müesse grife, wüws kei Absicherig het gha
D Absicherig isch immer gwärleischtet gsi u usserdäm isch di schwirigschti Steu “nume” es 3c gsi. Us Zytgründ hei mir hundert MüM. vorhär abroche. So isch dr Jo-Gipfu kührt worde. D Ussicht isch ab gad so grandios gsi, wisi uf äm Gipfu säuber. När hei mir de aui zäme nach äme mittuschnäue Mampf d stigise agleit u si di steile Firnfäuder abegloffe. Nach öppe ere haube Stund u ämene unfreiwiuige Telefonat mit dr KAPO Uri (wäge dunkläm Händybiudschirm) hei mir de Stigise abzoge u när no dr Räscht chönne abe rütsche. D Gamasche wo es paar hei bi däm pfludrige Schnee derbi gha, hei gueti Dienschte erwise. Churz vor äm Suchtepass hei mir no schnäu chönne üse Clätterskills are 5m lange 4c barfues teschte. Ig weiß bis hüt nid, öb ds üsne Füess het guet da. Bim Suschtepass achoo, si mir i ds Vergnüege vo stinkende Töffs, lute Sportchärä u 5.50 CHF türe 0,5 Liter PET-Fläschli ir Säubschtbedienig cho. Zu üsem Glück isch ds Aupetaxi scho chli vorhär aus abgmacht cho u so si mir müed uf Meiringe chauffiert worde. Nach äm obligate Avec-Ichouf si mir de dr glich Wäg zrügg gfahre wi häre.