Kletterlager Tessin

Kreative Kletterwoche in Klettergärten und an Mehrseillängen-Routen

Mir hei e cooli Wuche ds Ponte Brolla im Tessin mit äm Säschu u äm Noah Goa chönne verbringe. Dört hei aui vo üs chönne i bekannte u ou unbekannte Chlättergärte chlättere. So hei mir füf Minute vo üsem Basecamp chönne schöni Gneisroute chlättere, benenne u topografiere. Ä Route het so dr Name RuHuSo becho, während e anderi CASannaSAC heisst. Säubschtverstäntläch isch ou ds chlättere am Klassiker-Sunnechlättersekror Castelliere di PoBro und im eher schwirigere Sektor Ost nid ds churz cho. Mir hei i dere Wuche viu Route chönne projektiere u nach eim oder zwöi Versüech ou chönne sände. Am spätere Nami hei mir när meischtens ou Zyt gha, id Magga ds hüpfe, ds chille, ds schutte, ds choche usw.
De am Donnschti hei mirs de gewagt a schön Chlättergarte Balladrum bi Ascona go ds chlättere u när no es biz unfreiwigs Louftränig ds mache. So hei vier vo üs chönne dört e 7a+ namens Tarak ohni Block chlättere.
Am Schluss vor Wuche hei mir nach guetem übe ar Pinocchio-Platte de no ad 11 Seilänge langi Merseillänge-Route Quarzo am Speroni chönne wage. Schlussemänt heis de meh oder weniger aui dert ufe geschafft. Nach däm gnuss hei mir us sehr fescht über ds Picnic u d Usicht gefreut.
Leider hei mir am Samschti früh am Morge scho müesse zämepacke, obwohus no so viu Chlättersektorperläne zum entdecke hät gä. Aber wis haut so isch, me mues denn ufhöre wes am schönschte isch.
Merci viu mau Noah u Säschu fürs Leite u Organisiere vo dere ganze Wuche.