Rosenhorn statt Wetterhorn

Rollende Planung um das Maximum herauszuholen

D Tour het ma Samstigmorge agfange wo 3 vo wegeme Kafichränzli vorem INterSport üs fasch dr Bus in Grindelwald verpasst hättä. Nach der Ankunft sind mir denn ou komplett gsi und sind zur Glecksteihütte ufgstiege. D Duschi vom Wucheänd hei mir bim Hütteufstieg chönne gniesse wo mir wägä ämä Wasserfall chli nass si worde. Zum Glück z letzte mal das Wucheändi. Bis zum Znacht hemmer üs uf de Glecksteischaukle vergnüegt. (RIG)
Nach es bitzeli Uskundschafte und vergnüege uf dr Glecksteischaukle hei aui Lust ufenens feins Znacht gha, weles sehr überzügt het. Zum Zähputze simmer no vo paar Steiböck bsuecht worde. Am morge ischs eim Leiter leider nöd guet gange und er het i ds Tal abe müesse. Das het für üs au bedütet, dass mer nöd ufs Wetterhorn gönd, sondern Rose(horn) dr neu Trumpf isch.
De Weg dötte ane het üs abwächsligsrich über Gröll, Bäch, Leitere, apere Gletscher, und e wunderbari verschneiti südwest Flanke uf ä Gipfel gfüehrt. Und denn ischs im schönste Wätter über de Roselouigletscher abe gange, bis äs haut de nüm abe gange isch wäge de Spalte. Denn simer kehrt u und wieder ufe richtig Tossesattel kraxlet. Vo döt si mer de scho fasch wie Seilbähnli de Fixseil abcruiset bis zum Getränk uf dr Terrasse vo dr Dossehütte. Und denn het dr wahri Chrampf agfange, ganz abe loufe dür no meh Seilbähnliwäg wo meh Bach aus Wäg isch gsi. De witeri Abewäg het sich no zoge und zoge, au üsi Oberschenkel. Aber nacheme Frappé isch das scho wieder vergässe gsi.

S’isch e super Tour gsi und mer hend viel glernt. Merci a d Leiter!