Hochtourenausbildung Fels und Eis im Steingletscher 13.-14. Juni 2026

Mit super Wetter si mir am Samstimorgefrüeh i Hochtourekurs gstartet. Vo Bern isches i richtig Steigletscher gange.

Nach der Akunft hei d Michaela und d Jela mit Ungerstützig vom Nicolas und Sorin üs erschts tolls Wüsse chönne vermittle. Mir si vor ungerkunft chly ufe richtig Pfriendler ufes Gröllfäud gange u hei derte Seilverchürzige u Gehen am kurzen Seil agluegt.  

Wüus gäge Mittag ner doch recht warm isch worde, hei mir ds Abseile grad am Wasserfall chönne üebe. Nachem Abseile hei mir no dr Säubschtufstig agluegt, nachär si mir zrügg zur Uungerkunft gange u hei dert no d Stiigise igsteut. När heimer chly Pouse gha. Z znacht het si zwäk zwar erfüut, isch gschmacklech aber ke Meisterleistig gsi. Hätte si üs id Chuchi gla wärs es vermeintlechs 10/10 gsy. Nachem Znacht hets no ä contest ir Seilverchürzig gäh (ou wed Motivation für ds när nüme so ume isch gsy). Dr Yuri het die Competition aus underdog absolut grockt. Wüu dr Tag scho rächt asträngend isch gsi simer denne schön go pfüsele. 

Irgend e Glünggi het si Wecker anstatt uf di 05:40, uf 04:00 gstellt us zersch mau säuber gar nid gmerkt, bis er nach öppe füf minute ner doch gschnallt het dases ja si eiget Wecker isch. Schlussändlech hets aber niemer gross gstört, mir si schnäu wider igschlafe. 

Am 6i isches aber när würklech los gange u mir hei dörfe es feins Zmorgebuffet gniesse. Nachdäm aui Zmorge hei gässä u z Zimmer lärgrumt isch gsi simer los richtig Steigletscher. Wo mir bim Steisee si gsi hei mir churz agluegt wie me am beschte dert härä chunnt wo mir hei härä wöue uf dr Charte u im Gländ. När si mir witer dür z Militärgebiet uf dr Sattu bim Chööbärgli, dert hei mir när Häum u Picku uspackt u si über es paar Schneefäuder witer richtig Gletschertor. Am Gletschertor achoo hei mir d Stigise agleit u hei üs agseilet u si es paar hundert Meter ufe Gletscher gloffe bis mir ä guete Ort hei gfunge zum blibe. Mir hei denne z loufe mit de Stigise agluegt u d Jela u dr Nicolas hei i dere zit ä Parcours für üs ufboue für mit Pickel und Stigise, dä mir denne hei chönne mache. Es paari hei ono d Müglechkeit gha ischlätärä uszprobiere. Nachem Zmittag hei mir denne no die verschiedene Verankerige im Schnee und Iis agluegt, mir hei chönne T-Anker, Iisbire, Sanduhre mit Isschrube chönne boue. Nächer hei mir aus wider abboue u si zrügg. Leider het Zyt nümme glängt um d’Pickubräms no azluege. Bir Ungerkunft hei mir när no d Stigise la tröchne u hei üses ganze Züg zämäpackt. Am haubi 4i isches när mitem Aupetaxi richtig Meiringe a Banhof gange, dert hets när no ä glace gä u när simer zrügg uf bärn. 

Mercii a d Michaela, d Jela fürs leite u a Nicola u a Sorin bir Unterstützig, es isch mega cool gsi u mir hei aui viu Nöis glehrt.

Bericht: Levi und Luis
Teilnehmende: Nicolas, Sorin, Janosch, Lars, Levin, Linus, Timo, Wanja, Yuri, Levi, Luis, Nuria, Saskia
Leitung: Michaela, Jela