Eiertütschend nach Nidtalien sondern ins Glarnerland

Nid ganz Richtig Simplon i Schneesturm, sondern ab is Glarnerland isches am Donstigmorge früeh losgange. Aber dr Edi i üsem Aupetaxi ufe Urnerbode het gmeint es sig e gueti Entscheidig gsi. „Dr schönsti Ort vo de wäut!“ Fragt sech wie viu angers vor Wäut er scho hett gseh… So oder so, mit Edys Wort simer zueversichtlech i üsi 3 Täg Abentür gstartet. Dr Edi het söue rächt bhaute. Nach em ne chli durchzognige u luftige tag wo mr d gägend erkundet hei u üs dür nes feusloch hei abgseilet hei mr am friti sogar no es puverhängli gfunge. Übere gletscher hei mr d Planurahüttä erreicht u nach chueche u schieber e wunderschöne sunneungergang chöne bewundere. (Auso vorem Sunneuntergang isch no z Znacht gsi, Suppe, Salat, Pasta u Schoggimousse). Nachere wunderbare Nacht undeme feine Zmorge ischs los richtig Claride gange, mystischi Wind u Sunnestimmig heimer gha. Chum si mer im Ufschtig ufä claride gsi isch üs usem Nüt (Näbu) ä Heum entgägä cho. Nach witerem ufschtig het dr heum sini trägerin wider gfundä. Ufem Gipfu hets so gluftet dass mer d ussicht i näbu gar ni witer gnosse hei und direkt abe gfahre si. Bir abfahrt heimer no es par schöni schwüng im pulver chöne mache und ufem herte gletscherschnee mit wunderschönem wätter chönä carve. Ner si mer gmüätlech richtig tüfusjoch glüffe. Der hang isch steiler u steiler wordä, d sunne hett defür immer meh gschune. Em Tüfu es Ohr ab simer de über das joch drüber klätteret und äne abgseilet. D’Abfahrt isch e Wächsu zwüsche Pulver, Dechu und Sulz gsi. Es isch id Oberschänkle gange aber hett Spass gmacht. Mir si so wit abegfahre wie möglech und när hett üs dr Früehlig ighout. D’Schi heimer bugglet und si barfuess zrügg ufe Urnerbode tschirget. Ufe Bahnhof hett üs nid dr Edy sondern es angers Taxi bracht, wiu mit ihm hätte mer äue dr Zug verpasst. Nachemne Chäs-Tasting vom beschte Urnerbodner-Chäs (es hett ja gnue Chüeh dert obe) simer müed aber erfüllt i Zug gstige.

Moral vo dere Gschicht:
illeNNaa ille!

Derbi gsi: Saskia, Milo, Claudio, Silvan, Seraina, Surya, Manuel, Mathias, Theo
Tourenleitung: Flo