Lawinenkurs

Gstartet simer mitemne Vortrag am Fritigaabe im Clublokal. Mir hei theoretische Inputs über Lawine und z Bulletin vom SLF übercho. Am Samschtimorge heimer dr Zug uf Blankeburg (nid Wisseburg) gno und hei miteme grissne Sack Linse speter dr Ufstig gwagt. Nach paar informative Zwüschästopps und Schneeprofil simmer bir Fromatthütte acho.  Dert heimmer no Suächüäbige mitem LVS gmacht während dr George drinne scho dr Ofe ihgfüüret het. Nach däm mer di LVS gfunge hei, hei mir no e Rutschblock grabe. Dä Rutschblock hei mir wäg dr geringe Steilheit und dr meh oder weniger solide Schneedecki nid chönne uslöse. Nach däm Test siemer de i di schön vorgwermti Hüttä gange u hei üs ä Schlafplatz usgsuecht.

Zäme hei mir de gchochet. Gmüässuppe und Linsendal mit Ris. Es hett ono e chline how-to-Züpfe-Zöpfle Workshop gäh. Nachem Ässe heimer de dr Abä mit div. Spieli la usklinge. Bim Pantomime isch dr Zopf plötzlech zum Tintefisch worde und Mitemne Ohrwurm vo diverse Wörter wie Verantwortigsdiffusion heimer üs de langsam aber sicher ufe Weg is Bett gmacht.

Am Sunnti Morge heimer de die mit liäbi knätteti Züpfe gässe. Leider isch d Gonfi ufem wäg zur Hütte verschwunde.

Zu däm feine Brunch heimer mit em ne vorgäänige Bulletin ä fiktivi Tour ufs Albristhorn plant und hei aschliessend d Hütte putz. Nächhär isches los gange. Bim Ufstig heimer üsi i Spuuralag güebt und Einzuhäng beurteilt. Ufem Gipfu heimer Zmittag gässe und no es letschts mau es Schneeprofiu ahgluegt, wo nachem Räge vor Nacht bis uf 2000m ganz angersch het usgseh aus am Vortag. D Abfahrt isch eher chläbrig aus Lustig gsi doch mir heis gsung abegschafft.

Teilnehmende: Florin B., Valentina, Enzo, Manuel M., David, Nick, Florin K., Benjamin A., Simon, Surya, Benjamin H., Luis, Cara, Max, Saskia, Sorin, Cornelius, Manuel S.
Tourenleitung: Florian, Theo, George