Loading...

Skitourenlager Bourg St. Pierre

Vier Täg ohni Mönsche u Wulche. Skitourenlager der JO vom 8. bis 11. Februar 2023 in Bourg St. Pierre

JO im Gipfufieber


Crêta de Velle 2518,342m
Des Lüt us de eigte Reihe fähle isch ersch am Morge früe in Bärn bemerkt worde und so simer chrankheitshauber mitemne dezimierte Grüppli richtig Ungerwallis gfahre.
Z Bourg-St-Pierre simer nid i irgend einere Underkunft aacho, sondern imne Hotel!
Hinger der alte Fassade het sech e semi-gwinnorientierti Organisation mit charmantem Personal und guetem Ässe versteckt.
Uf der erschte Tour hei mer dr lokal Waud, ersti Lawinekund u di umligende Gipfle chöne gniesse.
Mir hei de o d Scheeverhäutniss wo üs di ganzi Wuche über begleitet hei zerste mau z gspüre becho.
Angeri Mönsche u Wulche hei mir genauso vergäbens gsuecht wie Pulverschnee.
Nach äre guete Ladig Spaghetti Bolo hei mer festgestellt des d Bett vo üsere Loge nid für aui Rügge gmacht si.

Pointe de Penne 2782,006m

Nach em Zmorge mit chli trochnigem Brot aber früsche Gipfeli, simer los zur zwöite Tour mitere bezaubernde Gratüberschrittig.
Bim Müldele bir Abfahrt si aui uf ihri choste cho.
Was wünscht mer sich meh nach sonere Tour aus Schni-Po zum Znacht.
Unger grosse Ouge vom Personal hei mir de o di letsche Pommes Frites vernichtet.
Wege zahlriiche Billiard Partie het z Personal trotz wenige Gäst müesse Überstunde mache.
Zum dr Abe abrunde hei mir im Fernseh i üsem Zimmer vergäbens nach explodierende Outos gsuecht.



Grande-Cenalette 2889,26m und Pointe de Drône 2949,04m
Nach usgibiger Theorie am Morge simer de mitem Poschi richtig St. Bernard ufbroche. D’Mission vom Tag: Bella Italia.
Nach däm mir d Passstrass u d Heerschare vo Lüt hinger üs hei gla, hei mir wieder vergäbe nach Mönsche u Wulche gsuecht.
Fazit: D Harschise si praktischer füre Ufstig aus dr Abstig.
Für die Überschrittig ufem Alpe-Houptkamm hei mir Zytewis d Ski ufem Rucksack und d Konzentration fescht uf de Füess gha.
Nachem Gipfu het di holperigi Couliorjagt agfange.
Bi üsem Znacht het z Fonduerechaud ufem tisch brönnt, und a de angere Tische isch Füür im Dach gsi. O süsch hets a dem Abe knisteret.
Zum de Tag abzschliesse hei mir zersch müesse usefinde wer am beste im Tichle isch u hei üs aschliessend no einisch im Billiard müesse bewiese.

Pointe de Tenou 2784,54m

Am Morge vom letste Tag hei mir vor dr Abfahrt vom erste und einzige Bös üsi Sache müesse packe und üs vo üsre Underkunft und em Personal verabschiede. Das isch allerdings nid aune glich eifach gfaue. Mit em Bus si mir nomau ufe gross St. Bernhard gfahre u hei üs vo derte us uf üsi letsti Tour uf gmacht. A däm Tag hei mir üs sogar usnahmswis chönne im Sulz bewiese und hei sogar ganz wenigi Wulche gseh und einzelni Mönsche uf üsem Gipfel troffe.

Mir danke am Flöru u Leo für die cooli Wuche.

Teilnehmer: Telemark-Theo, Florin, Milo u Bene.
Leiter: Leo-Philipp und Florian

/ | Kommentar schreiben

Kommentar schreiben

Deine E-Mail-Adresse wird nicht veröffentlicht. Erforderliche Felder sind mit * markiert

To top