Kletter/Tourenspass beim Galenstock

Mir hei es riese Glück gha, z zwöit mit zwöi Toureleiterinne dörfe ungerwäx z si. Durch die eis-zu-eis Beträuig hei mir sehr viu glehrt und spektakuläri Tourene chönne z mache. Am 1. Tag hei mir der Schildkrötegrat ufs chlyne Bielehorn gno, wo aber der Schildkrot viu meh wie e Schnägg usgset. Schnegge hemmer au vor üs gha was üs zumene Überholmanöver bewegt het.
Am 2. Tag hei mir när d Überschritig vom Galenstock übere Südostgrat gmacht. Zerst ischs über en zimli schittere Sidelegletscher gange, denn chli ungwohnt füre Hochtour über de Chlettersteig i di oberi Bielelücke. Ab dött ischs de schöni Südwestgrat, wo teils au rächt fordernd gsi isch bis under de Galestock gange. Denn hemmer scho zum dritte mal d Stiigiise agleit hüt und no de letzt stotz uf de Galestock uegnoh. Noch churzem Ussicht gnüsse isches wieder abe gange. En grosse Teil het üs d’ Abseilpiste abgnoh, wommer dank Turbostrategie isi schnell dunne gsi sind und sogar enere Leiterin vonere andere Gruppe e Abseilsternstund bereitet hend. Nacheme gröllige Abstieg bliibd nur no zsege dass d Leiterinne geili Siechinne sind. Und Teilnähmer ou!