Aletschgletschertour

D Tour het mau obe u nid undä gstartet. Ufem Jungfroujoch simr mit aunä Touristä düre Ispalast grütscht u hei im Lindtlädeli verschideni Gschmacksrichtigiä vo Lindorchuglä probiert.

Chli ruhiger isches ufem Gletscher worde. Nach churzem loufe isch dr Aletschgletscher apper worde u mir hei d Spaute ud Ussicht bewunderet. Bim loufe heimr üs Müeh gä nid id Spaute ds gheiä, ir Pouse widerum heimr üs am Spautechlätterä erfreut. Ds id Spaute abseilä u ufe picklä isch für vili es Highlight gsi. Ganz älei simr nid gsi, ä Einzugänger i Turnschueh het sech wit ufe Gletscher gwagt u mir hoffe, dasr nid zum Tötzi (Turnschuh-Ötzi) isch worde. Ä oberirdischä Schmelzwasserabfluss het üs dr Wäg zur Hütte abgschnittä u was blibt eim da angers übrig aus muetig drüber z springe (nass simr höchstens vom Angstschweiss worde). Dr Wäg zur Hütte isch nümm so eifach gange wie wo si bout isch worde u mir hei üs di vile Stägetritte ufechrampfet. Vor Konkordiahütte heimr die wahnsinnige Ussicht ufe Aletschgletscher gnosse u üs ir Winterhütte, womr älei hei dörfe bruche, ihgrichtet. We dr Ussicht mit üs weit gniesse gseht dr es paar vo üs uf dr Webcam😉.

Für nes paar chli früech, simr füre Sunneufgang ufgstande, Zmorge hets de ersch ä Stund speter gä, aber we es paar wach si, hei die angerä s witerschlafe chönne vergässe. Zrügg ufem Gletscher hei üs d Spalte dr Wäg um einiges verlengeret, drfür ischs Gletschererläbnis umso ihdrücklecher gsi. O d Gletschertischä uf dä Moräne hei üs mega fasziniert. Nach däm mr dr Wäg us dä Spaute u vom Gletscher gfunde hei ischs ahgnäm gsi d Stigisä ds ihpacke u we mä sech dä Luxus vo churzä Hose u Turnschueh het möge gönne ou die z wächsle. Dürs Tunnäu simr de ufd Fiescheralp gloffe u hei dr Tag miterä Glacé la usklinge.

Für einigi isch ds die ersti (u nid die letschti) JO Tour gsi, für anderi a lang ersehntä Troum u die landschaftlech ihdrücklechsti Tour, u für aui es zfridnigs Wuchenändi. Merci viu mau Michaela u Chantal heitr üs sicher überä Gletscher gfüehrt u üs die Tour ermüglecht.