Skitourenwochenende im Gantrisch

Ä gfröiti Sach

Nid au zu früe fahremer vom sunnige Bärn iz nebelige Gantrischgebiet, wo üs d Bise erwartet. Nachem Materialdepot bir Obere Gantrischhütte geits wiiter richtig Morgetepass, wo der Flöru mitem Mathias zäme hurtig e so ne Outobahn bout. Im Pulver (odr Triebschnee, je nach dem) fahrt sechs guet, Tee trinkt sech mit Zucker besser aus mit Salz (gäu Sarah). Sogar es Gipfeli heimer toppt u im Sturm pöiselet! Guet gstärkt flitze mer abwärts mit grosse u chline Kürvli u nidmau emne unfall! Jez geits bärgab zum seeli es paar göh no ufd Birä und di anderä gö scho chli gah fürä und schneebänklisboue. uf em obst-berg het üs d bise no es letschts kräftigs müntschi gä. aus de aui ir hütte scho si gsi, isches de o mau az choche, bache u zöpfle gange. wie jedes jahr hetts chli z weni ässe gha, drfür e ovo-chueche. dasses dunkli ovo git wüsse iz die meiste, mir hei e no dünkleri erfunde, wo chli kohlig schmöckt. d hütte isch zwar vo usse e heisse ablick gsi aber ir nacht hemer ire wahr charakter erlebt -mir si fascht verfrore. nächst morge si öppe au müed u ungerchüut a zmorgetisch ghocket, um dr säubergmacht zopf (wo dank manglender hefe, es hett nume suurteigstarter ghaa, u meh aus gnue anke nid so richtig hett weue ufgaa, u für wenig volume viu kalorie hett botte) z gniesse. wider ni au zu spät simer zum morgetepass ufespaziert, um ufder schibe azcho. hie hett sech d gruppe trennt, es paari hei no e äxtrarundi dräit. di einti gruppä isch übere leiterli pass zrügg. dr schlafmangu hett sech bi diune meh bemerkbar gmacht aus bi angerne: wärend dr abfart id flächi het ä gwüssä milo ä chlinä sturz kah und es het inm dr rucksack dür magischi wis a buch transferiert.
dr noah het wöue mit de fähli abefahre. bösi zunge bhoupte är hets verlaueret se drab z nä.
bir gantrischhütte hetts no für nes schorle glängt, u de si mer scho mit em bus richtig bärn hei. (es hei o würk aui gärn chümi ghaa)