Überschreitung Lobhörner

Überschreitung der Lobhörner vor der Kulisse von Eiger, Mönch und Jungfrau. Übernachtung in der Lobhornhütte

Archivbericht

Tourebricht für d Lobhörner
Guet gluunet simer im brätschvoue zug richtig luterbrunnetau gfahre, mit houptsächlech gültige tickets, witer mit bus und bahn uf sulwald. Dr marsch bärguf het gfolgt bis zum materialdepot wo mir hei gmacht. Und denn witer ufe bis zu de Lobhörner. Für einigi isch d Schlüssusteu scho bi dä erstä Meter cho, andere si problemlos ufe, drfür isch dr Rucksack ungä vergässe ganga. Dä het mä när am Feus na ufegschränzt. D Klätterei isch denn sehr ahgnähm und abwächsligsriich gsi. Stand baue, sichere, Seilmangement und Seilverkürzige. Alles isch mehrmols Programm gsi. Ganzi 5 Stund hän mir könne klättere, bis mir vom Wätter und dr Zytt zum Znacht zwunge gsi sin und d Tour noch dr Zipfelmütze hän müsse verkürze. Mir hän über 40m abgseilt und das zwöi mau – wau! Nach em ne zügige Abstig hei mirs meh oder weniger Pünktlich, meh oder weniger troche zum Esse it Lobhornhütte gschafft. Am gspräch nebedranne luschend, wos Fondumischige und Rumänie heiss diskutiert si worde, hei mir üs über die erschte zwe gäng hergmacht. Nachdem sich aso di meischte mit Linsesuppe u Salat hei der Buch vougschlage isch passend mit em Satz: „was das isch ersch t Vorspies gsi?!“ e Topf Öpfumus und tröchneti Zibele ufe Tisch gstellt worde. T freud isch risig gsi u der Fall klar, es git Älplermagaroni!
Nach zwe Stung Tichu und e re interessante Diskusion über Menstruation simer de o scho gha pfuuse i üsere private Hütte. D bett si aso weicher gsi aus i de auerimeiste hüttene. Sehr usgrueht simer aso nächst morge zum tolle sunneufgang usem näscht.
Planet wär zwar bi einzelne o e schwumm gsii, aber dä isch em stränge zitmanagement zu opfer gfaue.
Nachem zmorge simer abe zu einzelne felse u hei dert chli theorie aagluegt, wie ständ boue, keile setze, fründe bruuche, navigation im ,,chriisdicke näbu“ und ersti hiuf bi bärgumfäu usem repertoire vom jönu.
Nach dem lehrriche postelouf hei mir aber ou mau i richtig hütte zrüggmüesse, z dert deponoerte Materiau abhole u i richtig sulwald loufe.
Es het üs no grad möge verschiffe ufem wäg abe. Z wätter isch oh dr grund gsi warum mir d inhalte vo samtsi und suntig hei tuscht. Klättere am samsti, theorie am sunti.
In sulwald hets liechti verwirrige gäh mit dä aawisige vom chauffeur wo ir undere hautsteu isch gsii, (über luutsprächer)
aber mir heis aui heil nach unde gschafft.
D rückreis vo iseflue het när äbefaus mit houptsächlech güutige tickets stattgfunde, und si iz rächt müed aber glücklech im zug für uf bärn – bäm.