Skihochtour Doldenhorn 3643müM

Nechsts Level: Spitzcheri 2.0

Archivbericht

Dr nachwuchs weis wie chille, drumm heimr ersch ufe mittag dr zug richtig kanderstäg gnoh. Im ufstig id hütte hett üs dr leo ds spitzcheeri 2.0 biibracht. Em näbu sei dank, heimr gar ni gseh a was fr feuswänd mr richtig hütte si vrbigloffe. (d ussicht vor hütte wär übrigens schön, d sicht bi vollmond hetts üs bewise). 5 minute nach dr akunft hets ä super wäg gä zum wc. (trittsicherheit erforderlich)
Im obere stock geisteret dr hüttewärter dsume (siehe bild).
Di üsserst umsichtigi chuchi-crew hett oh 3 mau nachgefragt ob oh würklech aui gärn chümi hei. Dr drügänger hett aune gmundet. (bis uf di heissi schoggi zum abwäschwasser spare) d toureplanig isch sehr harmonisch vrloffe, bis zur diskussion um weli zitt dsme jitz mit dr zitumstellig mues ufstah. Bis hütt simer üs ni sicher, um weli zitt mir
jitz ufem gipfu si gstange. Isches am 1 winterzit ? Oder glich am 12 summerzyt? Kene chunnt drus… Am nächste tag simer am 5 (oder glich am 6i?) ufgstange und hei rack zack zmorge gässe, u mitem erste tagesliecht simer richtig punkt 2500 gloffe.
Mit gueter Gschwindigkeit sin mir denn bim erschte Tagesliecht uffgstiege. Ganz allei sin mir zwar nitt gsi, doch hett sich alles guet verteilt. Spitzkehri um Spitzkehri hän mir uns langsam uffegschafft. Erscht hett mes für unmöglich ghalte, dass mir a däm Nordweschthang no d Sunne gsehn. Doch nochem Uffstieg durch e schönes Couloir hett sie uns denn willkommme gheisse. S tagesziel (luut dä supergschiide uhre) vo 10 Stockwerch Stegetritt mache hemmer denn gad abghogget. Vum Gletscher hemmer gar nöd vill gseh willer so schöön überschneit gsi isch und mir henden ohni problem chönne passiere. Dä Wind het üs immer wider e abchüelig verpasst idem er üs eismol nochem andere Schnee is Gsicht blose het. Dobe ahcho hemmer e super 360Grad Ussicht gnosse. Ds Gipfufoto hetts natürlech o gä, o wenn nume um dBilanz vo.. +/-10% ds bestätitige. DAbfahrt hett nis unverhoffte Pulver botte (ussert im couloir, dert hett ds Abrütsche vor auem Krämpf usglöst). Öppe 1000hm wiiter unge isch no grad es zwöits couloir choo…. machbar, isch aber e sogenannti Komfortzoneerwiiterig. Uf em Wanderwäg geits besser ohni Schii aus mit (je nach dem, ob si neuer oder äuter si zieht me se früecher oder später ab). Nachem Bäretritt simer nume no churz uf dr strass gloffe, u de si mer dsletschte Stück uf ere summerleche piste abegfahre. Die auerletschti Schlüssusteu (ds schribe vom Bricht) hei mer nach ere Glace/Schorle/Kafi-pouse im Zug zeme bewäutiget.