Tourenwoche Gelmer/Trift

…d Fortsetzig vom Zoobesuch: „Safari am Oranje“… diesmau im Gelmer / Triftgebiet

Archivbericht

Safari am Oranje

Nachemne Ufschwung a Gelmersee heimr dr erst Exot am Bärg atroffe. Di sogenannti Härzarschantilope bewegt sesch mit grazile Bei und mit viu Style über Stock u Stei hinwäg. D Marika het sech mit ihrem Sfarihuet aapirscht und ihri Spur ufgno. Es paar Kurve witer heimr vorsichtig e Leopard überholt. Vorem Steile Ufstieg isch nis no ä Herde Niupferd entgägecho, wo üsi Garderobe fasch i See beförderet hätt. Chum si mir dobe aacho, hei di mobili Migrosfiliale und ds Freiluftcasino ihri Tüür göffnet. Bi früscher Brise, aber immerhin Sunne, heimr wallisser Aprikose gässe und flügendi Buure gjagt.
Am nächste morge simr die steili Leitere ds dürab us üsem Boumhuus gchlätteret. Mit Stigise u Machete bewaffnet heimr üsi Safari in Richtig Diechterlimmi fortgsetzt.Gchraxelnd heimr ds Diechterhorn erreicht und hei es erst u letzts mau üses Jagdrevier dörfe überblicke. Weniger erfolgriich isch dr Französischkurs verloffe. Leider ohni Schii, simr die sanfte Düüne abegstouperet. Vor Gletscherspaute oder Felsstürz bewahrt, simr pünktlech zum Zmittag ir Hütte aacho. Dr Hirsch u dr Bock hei wie immer ihri croute au fromage vrdrückt. Währenddäm dr Siebeschläfer sech verchroche het, isch dr Bouarbeitertrupp nomau ufene Expedition ufbroche. Üse Viergänger mit früschem Brot isch vo de Brüllaffe begleitet worde.
Motiviert hei mir üs am nächste Morge früeh am Gschirrlade u Gletscherschliff agnoh. Leider simr churz drufabe bim Stigise montiere iignäblet worde. Dr Hisch u dr Bock hei sech zumene gheime Meeting zruggzoge. Nachemene einstimmige Entscheid simr erhobenen Hauptes zum Rückzug aaträtte. Chum hets afah tröpfele, heimr üs ir Hütte verschanzt und em Jasse gwidmet. Nachere engagierte Partie si d MoMos aus Sieger hervorgange.
Nachemene Toureplanigsseminar mit zytgenössischem und antikem Chartematerial und Literatur, isch d Siesta vo Fläschezug bouende Hornochse und -chüe verunmüglicht worde.
Tichu zum Trotz heimr entschiede usem schlächte Wätter ds flüchte. Uf im wahrste Sinn vom Wort verschissnige u nasse Wäg isch nis Kreti u Pleti i Converse, Sandale und Barefoots entgägechoo.
Nachemene Flug dür d Wulche, simr mit em gäube Schnägg und am ICE nach Bärn gfreeset. Dank äm Migros Usverchouf isch d Zugfahrt dürne Nusstorte versüesst worde.