Hohlaubgrat Allalinhorn

Tourebricht??? Cha me mache… (muess me äbe oh?)

Am 6:50 simr richtig Saas Fee düüset. Via Coop simr mit dr Bahn zur Station Felskinn gfahre. Vo dört simr ufe Gletscher zottlet zum äs paar Üebige mache. Nachemne lehrriche Namittag hett dr Chuecheduft üs i d Hütte glockt. Nachemne köstleche und vegifründleche Gricht simr äs paar Stung ga löie (der Aplinist schläft nicht, er ruht…).
3:45 dr Hüttegüggu stört üsi Rueh. Zackig heimer üs parat gmacht u si i Richtig Gletscher gstoche. Im Liechtchegu vor Stirnlampe simr übere Gletscher trottet u die meiste si grazil über d Gletscherspaute ghüpft.
Ir Morgesunne heimr de üs füre Gratufstieg parat gmacht. Im Zick-Zack simr Schritt für Schritt dr Schlüsselsteu nächercho. Grosszügig wimr si heimr es Fixexpress ir Wand installiert. Im Polarsturm heimr dr Gipfu erreicht. Nachere churze Photosession heimr dr Abstieg i Aagriff gnoh. Pünktlech zum Znünikafi simr im Restaurant aacho. Weu mr scho äs Retourbillet glöst hei gha, heimr leidr müesse mitem Gondeli abefahre u si nid i Gnuss Rocky Mountains cho.

Bericht: Teilnehmer Teilnehmer: Kilian, Isabelle, Sarah, Robin, Loris Leitung: Beni, Simu