13. -14. August 2016 Nadelhorn

Äs het usgeh, aus ob wieder eis die ganz Schwiz ungerwägs wäri. Doch diesmau isch d SBB perfekt druf vorbereitet gsi. Nadisna het sech dr Zug mit JOler gfüllt u ds Thun si mir komplett gsi. Bequem mit dr Bahn uf d Hannigalp ufe u dert het üses Oug o scho öppis erspäht. Doch da derzue später…
Uf äm Hüttewäg ischs üs nid längwilig worde. Het viel ds verzelle gä u so si mir irgendeis o acho. Was hei mir ir Hütte gseh hange? D Charte vor Cabanne de Mountet vo ändi Juli wo d JO Bärn scho akündet het. Merci Hans 😉 Am Namittag die obligate Vorbereitige für ä nächst Tag: Materialkontrolle, Aseile, Seilverchürzig, Rucksackpake… schliesslech ischs für ä eint oder anger dir ersti Hochtour gsi. D Hütte isch a däm schöne Wucheänd bis zum Berste voll gsi. Äs het sech abahnt, dass d Schlüsselstell vor bevorstehende Tour wird darin bestah vor Hütte furt ds cho.
D Vorahnig vom Abe het sech bewahrheitet. Äs isch i de früeche Morgestunde rächt äs glöif gsi. Doch guet ä Halbstund nach äm ufstah si mir losglüffe. Bi Stirnlampeliecht zum Gletscher ufe, aseile (wie guet dass mir das no agluegt hei gha) u de witer übers Gletscherplateau zum Windjoch ufe. Dert ä churze Rast, so dass mir chli witer obe schöni Föteli vom Sunneufgang hei chönne mache. Mit perfekte Bedingige im Firn si mir am Gipfel entgäge gstiege. Was für ä prachts Tag! Churz vor äm Gipfel ä chli Fels u de hei mirs nach 3 Stund o gschafft gha. Het grad für äs paar Föteli glängt u de si d Karawane hinger üs o scho cho. Für enang nid i d Queri ds cho übere Felsgrat abekraxle u de witer abe i d Ufstiegsspur. So hei mir ds Chrüze mit de angere Seilschafte chönne vermiede.Die einte vo üs hets no ufs Ullrichshorn zoge u d Blatere a de Füess die angere zum diräkte Abstieg bewoge. Ä Chueche- u Kafirast bir Hütte darf nätürlech o nid fähle. Dr witer Abstiteg isch schnäll verzellt: Steil u geit i d Chnöi, aber nume bis zur Hannigalp. Dert d Rucksäck i ds Gondeli lade u Trottinett fasse. Mit dene Gfährt stigt dr Spassfaktor bim Abstieg i ds Tal extrem 🙂
Mit är Glace ir Hand si mir i ds Poschi istiege. D Ussicht uf ene Aareschwumm am Abe ds Erläbte tolle Wucheänd het üs mitemene glückleche Gsicht la hei fahre

Teilnehmer: Lena, Vivane, Pascal, Jonas, Oliver, Jens Leiter: Simu u Simu (aber nid Brüetsche), Philipp