2.-4.1.2003 Schituure Liderne statt Rotondo
Archivbericht
Üsi Leiter mit GA und weni Bahnhoferfahrig hei ds Umstige zum Orientierigslouf gstautet. Dr Michu het d’Zit vom Zugwächsu mit em ne vorbahnhöfleche Zug-WC-Bsuech richtig spannend gmacht. Mir si schlussändlech bi Rägewätter mit em ne luschtig-luftige Bähnli wi plant ir Liderne acho.
Am erschte Namittag hei mer üs lengeri Zit mit Bärivox und Sonde beschäftiget. Am zwöite Tag si mir uf e Rossstock gloffe.
Mir hei super Wätter u uf em Gipfu sehr e gueti Witsicht gha. Dr Schnee het z’wünsche übrig gla (sehr abwächsligsriich). Am Abe hei mir im Zündhöuzli-Zunge-Spiu dr lengsemscht under üs aus Liechtboy (Zitschauter bediene) erhobe.
„I bi ömu no schnäu gsi“ het er derzue gmeint.
Dr Bene het üs am Abe sini Männlechkeit mit Turnspagaramänte z’Ouge gfüehrt. Z’GPS het zeigt: o Lüku u Bene müesse no chli hinder d’Technik sitze: Mir hei nämlech e chline Umwäg müesse mache u si de doch no uf em Hagustock acho.
Das Mau isch dr Schnee dr Hammer gsi: 15 cm Nöischnee.
Üsi Leiter hei trotz es paar Patzer glänzt!
Mänu, Res, Didi, Michu, Harold, Mättu, Chrigu.